کراچی…جسٹس ریٹائرڈ وجیہہ الدین احمدنے کہاہے کہ جسٹس ریٹائرڈعبد الحمید ڈوگرنااہل جج تھے اورالجہاد کیس کے فیصلے کی روشنی میں شریف آدمی سمجھ کر انہیں ریگولرائز کیاگیاتھا۔ان کا کہناہے کہ عدالتی نظام میں کرپشن کے باعث از خود نوٹس لینے سے متعلق عوامی درخواستیں چیف جسٹس تک من وعن نہیں پہنچ رہی ہیں۔ 3نومبر 2007 کے غیرآئینی اقدامات کیخلاف کراچی سٹی کورٹ میں عدالتوں کا مکمل بائیکاٹ کیا گیا۔وکلا کے بائیکاٹ کے باعث قیدیوں کو مقدمات کی سماعت کیلئے عدالتوں میں پیش نہیں کیاگیا ۔اس موقع پر کراچی بار ایسوسی ایشن کی جنرل باڈی اجلاس سے خطاب کر تے ہوئے جسٹس ریٹائرڈ وجیہہ الدین احمدنے مطالبہ کیا کہ آرٹیکل6کے اطلاق میں کچھ قانونی پیچیدگیاں ہیں اس قانون میں ترمیم کی جائے۔ انہوں نے کہاکہ اگر پرویز مشرف کے خلاف کارروائی نہیں کی گئی تو وکلا اور عوام سڑکوں پر نکل آئیں گے۔ ان کا کہنا تھا کہ عدالتی نظام میں کرپشن کے باعث از خود نوٹس لینے سے متعلق عوامی درخواستیں چیف جسٹس تک من وعن نہیں پہنچ رہی اس کا نوٹس لیا جائے۔ انہوں نے کہا کہ جسٹس ریٹائرڈ عبد الحمید ڈوگر کا تقرر سابق وزیر اعظم بے نظیر بھٹو کے دوسرے دور میں سیاسی بنیادوں پر کیا گیا تھا۔
