کراچی…سوئی سدرن گیس کمپنی،جے جے وی ایل اور میٹرز کی فروخت سے حاصل ہونیوالے منافع کے حصول کی کوشش کر رہی ہے،یہ بات سوئی سدرن گیس کمپنی کے منیجنگ ڈائریکٹرعمیر خان نے وفاق ایوان ہائے صنعت و تجارت پاکستان میں سی این جی ڈیلرز سے بات چیت میں بتائی۔ انہوں نے بتایا کہ جے جے وی ایل سے سالانہ تقریباً ایک ارب روپے اور میٹرز کی فروخت سے تقریباً تین کروڑ روپے کی آمدن سوئی سدرن گیس کمپنی کو نہیں دی جاتی جسکے باعث کمپنی کا منافع کم ہورہا ہے۔عمیر خان کا کہنا تھا کہ کمپنی گیس خریداری کی مد میں بلوں کی ادائیگی سے پہلے ایکسپلوریشن کمپنیوں کو رقم دیتی ہے جس پر سود کی مد میں ادائیگیاں بھی ایک بوجھ ہیں۔انہوں نے کہا کہ سی این جی اسٹیشنوں کی جانب سے کم قطر کی پرانی لائنیں تبدیل کرنے کے لیے مرحلہ وار کام شروع کیا جائے گا۔انہوں نے ایک بار پھر کہا کہ سندھ اور بلوچستان میں موسم سرما میں گیس لوڈ شیڈنگ کا کوئی منصوبہ نہیں ہے۔ ایم ڈی ایس ایس جی سی کا کہنا تھا کہ انہیں کم قیمت پر سی این جی کی فراہمی کے بارے میں انہیں بریف نہیں کیا گیا لہٰذا انہیں اس بارے میں علم نہیں۔عمیر خان کا کہنا تھا کہ ایس ایس جی سی نہ گیس کی قیمت بڑھاتی ہے نہ اسے اس کا فائدہ ہوتا ہے۔
|
