پن بجلی منافع کو110 ارب روپے تک محدود کرنے سے متفق نہیں،بشیر بلور
پشاور…سینئر وزیر سرحد بشیر احمد بلور نے کہا ہے صوبائی حکومت پن بجلی منافع کو110 ارب روپے تک محدود کرنے سے متفق نہیں ہے۔ یہ بات انہوں نے پشاور میں پارٹی ورکرز کے اجلاس سے خطاب میں کہی۔ انہوں نے کہا کہ پن بجلی منافع کے بقایاجات کا حصول تاریخی کامیابی ہے اور اب کیپ شدہ رقم بڑھانے کی باری ہے۔ سینئر وزیر نے پن بجلی بقایاجات کے110 ارب روپے کی ادائیگی پر وزیراعظم یوسف رضا گیلانی اور وفاقی حکومت کا شکریہ ادا کیا۔ انہوں نے کہا کہ بقایات110 ارب روپے تک محدود کرنے سے اے این پی کا اتفاق نہیں ہے۔ بلکہ2005 میں وفاق کے تشکیل کردہ اے جی این قاضی فارمولے کے تحت پن بجلی کے بقایاجات157 ارب روپے بنتی ہے۔ انہوں نے کہا کہ بقایاجات اور سالانہ کیپ شدہ رقم فارمولے کے مطابق طے کرنے اور30 ارب روپے تک اضافے کے لئے وفاق سے بہت جلد بات چیت شروع کی جائے گی۔
