کوئٹہ: فرنٹیئر کور کی چیک پوسٹ پر دستی بم سے حملہ، 4اہلکاروں سمیت15زخمی
کوئٹہ …کوئٹہ کے علاقے میزان چوک کے قریب فرنٹیئر کور کی چیک پوسٹ پر حملے کے نتیجے میں چار سکیورٹی اہلکاروں سمیت پندرہ افراد زخمی ہوگئے۔پولیس کے مطابق نامعلوم افراد نے لیاقت بازار، شاہراہ اقبال اور مشن روڈ کے سنگم میزان چوک پر ایک دستی بم پھینکا جو کہ چیک پوسٹ کے قریب گر کر پھٹ گیا اس دستی بم کے دھماکے میں ڈیوٹی پر موجود چار سکیورٹی اہلکاروں سمیت پندرہ افراد زخمی ہوگئے زخمیوں میں تین بچے بھی شامل ہیں ،اس دوران حملہ آور فرار ہونے میں کامیاب ہوگئے ۔دھماکے کے بعد زخمیوں کو سی ایم ایچ اور سول ہسپتال پہنچا دیا گیا جس میں زخمی ہونے والے بچوں کی حالت تشویشناک بتائی جاتی ہے ۔دوسری جانب دھماکے کے بعد پولیس اور دیگر سکیورٹی اہلکار موقع پر پہنچ گئے اور علاقے کو گھیرے میں لے لیا ۔دھماکے میں استعمال ہونے والے دستی بم کے بارے میں پولیس ذرائع کا کہنا تھا کہ یہ دیسی ساختہ تھا۔
