این آر او ہمیشہ کے لئے دفن ہوگیا،وزیر اعظم یوسف رضاگیلانی
قصور…وزیراعظم یوسف رضاگیلانی نے کہاہے کہ این آراوہمیشہ کے لئے دفن ہوگیا ہے،58ٹوبی کواستعمال نہیں کیاجاسکتاکیونکہ عدلیہ بہت مضبوط ہے ۔یہ بات وزیراعظم نے قصور کے قریب پتوکی میں نجی پاورپلانٹ کے افتتا ح کے موقع پر کہی ۔انہوں نے کہا کہ جمہوریت کا سفرنیاہے اسے مزید وقت دیا جانا چاہیے تاکہ اس کی جڑیں مضبوط ہوسکیں،انہوں نے کہا کہ مسلم لیگ ن اورایم کیوایم کے ساتھ اتحاد برقرارہے ۔ وزیراعظم نے مزید کہا کہ پاکستان بھارت سمیت تمام ہمسایہ ممالک سے بہترتعلقات چاہتا ہے اور پاکستان میں مداخلت کے ثبوت بھارتی وزیر اعظم من موہن سنگھ کو مذاکرات کے موقع پر فراہم کردیئے جائیں گے ۔وزیر اعظم یوسف رضا گیلانی نے کہا کہ وزیرستان آپریشن کامیاب جارہاہے اوروقت سے پہلے ہی ختم ہوجائے گا۔ ۔وزیراعظم نے کہا کہ اعتزازاحسن کو کسی عہدے کی پیش کش نہیں کی گئی تاہم وہ پیپلز پارٹی کے سینئر رکن ہیں اوران سے بات چیت ہوتی رہتی ہے ۔
