پنجاب سمیت وفاق کی تابع داری قبول نہیں، بشیر قریشی
کراچی…خورشید عباسی…جئے سندھ قومی محازکے چیئر مین بشیر قریشی کا کہنا ہے کہ سندھ،پنجاب سمیت وفاق کی تابع داری کوقبول کرنے کوتیار نہیں۔ یہ بات انہوں نے کراچی میں تبت سینٹر پرجئے سندھ قومی قومی محاذکے زیر اہتمام آزادی مارچ کے بعد کارکنان سے خطاب میں کہی۔آزادی مارچ گلشن حدید سے شروع ہوا اور ایم اے جناح روڈ پر واقع تبت سینٹر پر اختتام پذیر ہوا۔ مارچ کے بعد سندھ کے مختلف علاقوں سے آئے ہوئے کارکنان سے خطاب میں جسقم کے چیئر مین کا کہنا تھا کہ سندھ کی ٹیکس وصولیاں ،ملازمتیں، بندرگاہیں اور دیگر اموروفاق کے پاس ہیں اورسندھی عوام اپنے جائز حقوق سے محروم ہیں۔بشیر قریشی کا کہناتھا کہ حکومت پاکستان کا بجٹ 75 فیصد سندھ کے وسائل پر مشتمل ہوتاہے،تاہم اسے اس کا حق نہیں ملتا۔ انہوں نے کہا کہ باہر سے آئے افراد کی آبادی مقامی لوگوں کے برابر پہنچ چکی ہے اور سندھ کے قدیم باشندوں کو محکوم بنانے کی سوچی سمجھی سازش کاعمل جاری ہے۔
